ពិធីប្រគល់វិញ្ញាបនបត្រដល់សិស្ស
ភាសាអង់គ្លេសទូទៅ Level 6&12 ចំនូន ៨៤៣នាក់
ព្រឹកថ្ងៃទី២៤ ខែតុលា ឆ្នាំ២០១៥ សាលា ប៊ែលធី អន្តរជាតិ បានប្រារព្ធពិធីបើកបវេសនកាល ឆ្នំាសិក្សា២០១៥-២០១៦ និងពិធីប្រគល់វិញ្ញាបនបត្រភាសាអង់គ្លេសទូទៅ និងអន្តរជាតិ ជូនសិស្ស ចំនួន ៨៤៣នាក់ ក្នុងនោះLevel 6 ចំនួន ៤៩៩នាក់ Level 12 ចំនួន ៣៤០នាក់ និងវិញ្ញាបនបត្រអន្តរជាតិអាយអ៊ែល(IELTS) ចំនួន ០៤នាក់ នៅសាកលវិទ្យាល័យ ប៊ែលធី អន្តរជាតិ(សាខាទួលស្លែង) ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ស៊ាន បូរ៉ាត រដ្ឋលេខាធិការ ក្រសួងអប់រំ យុវជន និងកីឡា។ លោក លី ប៊ុនឆៃ អគ្គនាយករង ប៊ែលធី គ្រុប ទទួលបន្ទុកសាលា ប៊ែលធី អន្តរជាតិ បានអោយដឹងថាៈ នៅក្នុងឆ្នាំសិក្សាថ្មី២០១៥-២០១៦នេះ មានសិស្ស-និស្សិតកំពុងសិក្សាចំនួន ៣០.៥៧២នាក់ ហើយឆ្នាំសិក្សា២០១៤-២០១៥កន្លងមកនេះ មានសិស្សចូលរួមប្រឡងសញ្ញាបត្រមធ្យមសិក្សាទុតិយភូមិ ចំនួន ១.១០២ នាក់ បានប្រឡងជាប់ ចំនួន ៨៦៤នាក់ ស្មើនឹង ៧៨.៤០% ក្នុងនោះជាប់និទ្ទេស A ចំនួន ៦នាក់ និទ្ទេស B ចំនួន ៣២នាក់ និទ្ទេស C ចំនួន ៩៤នាក់ និទ្ទេស D ចំនួន ១៣៨នាក់ និង និទ្ទេស E ចំនួន ៥៩៤នាក់ ដោយឡែកថ្នាក់ទី៩ មានសិស្សពូកែជាប់ទូទាំងរាជធានីភ្នំពេញ ចំនួន ០៧នាក់ និងជាប់សិស្សពូកែទូទាំងប្រទេស ផ្នែកអក្សរសិល្ប៍ខ្មែរ ចំនួន ០២នាក់ផងដែរ។ កន្លងមកសិស្សបានប្រឡងបញ្ចប់ថ្នាក់ទី១២ ទាំង១០ជំនាន់ (២០០៤-២០០៥ ដល់ ២០១៤-២០១៥) មានចំនួន ៦.០០៦នាក់ ជាប់៥.៤២២នាក់ ស្មើនឹង ៩០.៣០% និង សិស្សភាសាអង់គ្លេសLevel12 បានប្រឡងបញ្ចប់ទាំង៣៦ជំនាន់ ចំនួន ៣.៨៥០នាក់ ហើយសញ្ញាបត្ររបស់សិស្សទាំងអស់នេះ សាលាបានបញ្ចូលទៅក្នុងវេបសាយសាលា ប៊ែលធី អន្តរជាតិដែលមានអាសយដ្ឋាន www.beltei.edu.kh ត្រង់ចំណុច G (បញ្ជីឈ្មោះសិស្សបញ្ចប់សិក្សា)។ បន្ទាប់មកឯកឧត្តម លី ឆេង អគ្គនាយក ប៊ែលធី គ្រុប និងជាសាកលវិទ្យាធិការ សាកលវិទ្យាល័យ ប៊ែលធី អន្តរជាតិ បានថ្លែងអំណរគុណចំពោះឯកឧត្តមប្រធានគណៈអធិបតី ដែលបានឆ្លៀតឱកាសដ៏មមាញឹកមកផ្តល់កិតិ្តយសដល់សិស្សជ័យលាភីទាំងអស់ដែលត្រូវទទួលវិញ្ញាបនបត្រនៅពេលនេះ។ ឯកឧត្តមក៏លើកឡើងពីការរីកចំរើនរបស់ប៊ែលធី និងការខិតខំប្រឹងប្រែងរបស់បុគ្គលិកទាំងអស់ ដែលមកដល់បច្ចុប្បន្ននេះ មានបុគ្គលិកសរុបជិត ១.៧០០នាក់ និងបានផ្តាំផ្ញើដល់ក្មួយៗទាំងអស់ ត្រូវខិតខំរៀនសូត្រ ដើម្បីបង្កើនចំណេះដឹងរបស់ខ្លួន ដោយផ្តោតទៅលើជំនាញទាំង៤ គឺ ការនិយាយ ការស្តាប់ ការអាន និងការសរសេរ ហើយនៅពេលបញ្ចប់Level12 សិស្សត្រូវទទួលបានពិន្ទុជាអន្តរជាតិតេស្តថូហ្វែល(TOEFL) ឬ អាយអ៊ែល(IELTS) ឲ្យបានពិន្ទុយ៉ាងតិច5.5ឡើងទៅ ដើម្បីងាយស្រួលក្នុងការដាក់ពាក្យសុំអាហារូបករណ៍ទៅសិក្សានៅក្រៅប្រទេស។ ជាក់ស្តែងឆ្នាំនេះ សាលាបានផ្តល់អាហារូបករណ៍ ចំនួន ១៧នាក់ ដោយរួមទាំងសិស្សនិទ្ទេស A ចំនួន ៦នាក់ផងដែរ ឲ្យទៅសិក្សាថ្នាក់បរិញ្ញាបត្រ នៅចក្រភពអង់គ្លេសចំនួន ០១នាក់ ប្រទេសសឹង្ហបុរី ចំនួន ១៥នាក់ និងសាធារណរដ្ឋប្រជាមានិតចិនផ្នែកពេទ្យ ចំនួន ០១នាក់ ហើយសរុបសិស្សអាហារូបករណ៍ ដែលបានទៅសិក្សាក្រៅប្រទេសគិតត្រឹមខែតុលា មានចំនួន ៤១នាក់។ ក្នុងឱកាសនោះផងដែរ ឯកឧត្តម ស៊ាន បូរ៉ាត បានធ្វើការសំណេះសំណាល និងផ្ញើក្តីនឹករលឹកនិងសាកសួរសុខទុក្ខពីសំណាក់ ឯកឧត្តមរដ្ឋមន្ត្រី ក្រសួងអប់រំ យុវជន និងកីឡាជូនដល់ ថ្នាក់ដឹកនាំ លោកគ្រូ-អ្នកគ្រូ បុគ្គលិក និងសិស្សានុសិស្សទាំងអស់របស់សាលានាពេលនោះផងដែរ។ ឯកឧត្តម បានថ្លែងកោតសរសើរ និង ចូលរួមអបអរសាទរដ៏ស្មោះចំពោះជ័យលាភីទាំងអស់ដែលបានខិតខំប្រឹងប្រែងតស៊ូរៀនសូត្រ រហូតបានទទួលភាពជោគជ័យ គួរជាទីមោទនៈ។ ឯកឧត្តម បានបន្តថា តាមរយៈចំនួនដ៏ច្រើនរបស់សិស្សសាលាប៊ែលធីអន្តរជាតិ មានរហូតដល់ជាង ៣ម៉ឺននាក់ បានឆ្លុះបញ្ចាំងពីការរីកចម្រើន និងកិច្ចខិតខំប្រឹងប្រែងរបស់ថ្នាក់ដឹកនាំ និងបុគ្គលិកគ្រប់លំដាប់ថ្នាក់ លោកគ្រូអ្នកគ្រូ ក្នុងការរក្សាទាំងកំណើនខ្ពស់នៃសិស្សចូលរៀន និងគុណភាពសិក្សាស្តង់ដាអន្តរជាតិ។ ឯកឧត្តម បានថ្លែងបន្តថា ភាពរីកចម្រើនរបស់សាលាប៊ែលធីអន្តរជាតិ មិនមែនកើតឡើងដោយចៃដន្យឡើយ គឺប្រាកដណាស់បានពីការយកចិត្តទុកដាក់ បំពេញការងាររបស់ថ្នាក់ដឹកនាំ បុគ្គលិកគ្រប់លំដាប់ថ្នាក់ ហើយក៏មិនអាចកាត់ផ្តាច់ បានពីការខិតខំរៀនសូត្ររបស់សិស្សានុសិស្ស និងមាតាបិតាសិស្សនោះដែរ។ ជាមួយគ្នានេះ ឯកឧត្តម ស៊ាន បូរ៉ាត ក៏បានធ្វើការផ្តាំផ្ញើដល់សិស្សានុសិស្ស ឲ្យបន្តការខិតខំប្រឹងប្រែងសិក្សារៀនសូត្រ ស្រាវជ្រាវបន្ថែមទៀត ដើម្បីក្លាយជាធនធានមនុស្ស មានដែលមានសក្កានុពលសម្រាប់ប្រទេសជាតិ។ ឯកឧត្តមថា ការសិក្សារៀនសូត្រ មិនមែនទទួលបានសញ្ញាបត្រហើយបញ្ចប់ទេ គឺការសិក្សាត្រូវធ្វើឡើងពេញមួយជីវិត គឺគ្មានទីបញ្ចប់ ។ ឯកឧត្តមថា ដើម្បីជាធនធានមនុស្សប្រកបដោយសមត្ថភាពពិតប្រាកដ គឺត្រូវមានចំណេះដឹង បទពិសោធន៍ និងសីលធម៌ ។ ឯកឧត្តមក៏បានធ្វើការរលឹកទៅដល់សិស្សានុសិស្សទាំងអស់ដែរថា ត្រូវដឹងថាខ្លួនឯងជាអ្នកណា កំពុងធ្វើអ្វី និងធ្វើដើម្បីអ្វី។ បន្ទាប់មក ឯកឧត្តមប្រធានគណៈអធិបតី បានប្រគល់វិញ្ញាបនបត្រLevel 6 &12 និងកម្រិតអន្តរជាតិ(IELTS) ចំនួន ៨៤៣នាក់ នាពេលនោះផងដែរ។
|
![]() ![]() ![]() ![]() ![]() ![]() ![]() ![]() ![]() ![]() ![]() ![]() ![]() ![]() |
![]() |
![]() |
![]() |
![]() |
![]() |
![]() |
![]() |
![]() |
![]() |
![]() |
_______________________________________________________________________