នាព្រឹកថ្ងៃពុធ ១រោច ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១១ ខែមិថុនា ឆ្នាំ២០២៥ នៅខេត្តព្រះវិហារ ឯកឧត្តមបណ្ឌិត លី ឆេង តំណាងរាស្រ្តមណ្ឌលរាជធានីភ្នំពេញ និងជាអគ្គនាយក នៃប៊ែលធី គ្រុប បានដឹកនាំថ្នាក់ដឹកនាំ នៃប៊ែលធី គ្រុប ចូលរួមអមដំណើរគណៈប្រតិភូនៃសហភាពសហព័ន្ធយុវជនកម្ពុជា (ស.ស.យ.ក) ដឹកនាំដោយ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា អញ្ជើញចុះជួបសំណេះសំណាល និងនាំយកថវិកា ស្បៀងអាហារ និងសម្ភារៈប្រើប្រាស់មួយចំនួនទៅប្រគល់ជូនដល់កងកម្លាំងប្រដាប់អាវុធគ្រប់ប្រភេទដែលកំពុងឈរជើងនៅតាមបន្ទាត់ព្រំដែន។ 

ឆ្លៀតក្នុងឱកាសនេះដែរ ឯកឧត្តមបណ្ឌិត លី ឆេង បានថ្លែងអំណរគុណចំពោះ ថ្នាក់ដឹកនាំ បុគ្គលិក សាស្ត្រាចារ្យ លោកគ្រូ-អ្នកគ្រូ នៃប៊ែលធី គ្រុបទាំងអស់ រួមទាំង សិស្សានុសិស្សនៃសាលា ប៊ែលធី អន្តរជាតិ និងនិស្សិតនៃសាកលវិទ្យាល័យ ប៊ែលធី អន្តរជាតិគ្រប់ទីតាំង ព្រមទាំង ឯកឧត្តម លោកឧកញ៉ា លោកជំទាវ លោក លោកស្រី ជាមាតាបិតា និងអ្នកអាណាព្យាបាលសិស្ស-និស្សិតទាំងអស់ ដែលបានចូលរួមបរិច្ចាគថវិកាដោយស្ម័គ្រចិត្ត និងតាមលទ្ធភាព ដើម្បីរួមចំណែកឧបត្ថម្ភដល់កងទ័ពជួរមុខឈរជើងនៅបន្ទាត់ព្រំដែន ដែលក្នុងនោះ ទទួលបានថវិកាសរុបចំនួន ១២០,០០០,០០០.០០៛ (មួយរយម្ភៃលានរៀល) ជូនដល់កងទ័ពឈរជើងការពារជាតិ មាតុភូមិនៅតាមបណ្ដោយព្រំដែនកម្ពុជា-ថៃ ដើម្បីចូលរួមគាំទ្រ លើកទឹកចិត្ត និងជាការដឹងគុណចំពោះការលះបង់ដ៏ធំធេងរបស់កងទ័ពគ្រប់ប្រភេទ ដែលកំពុងឈរជើងការពារជាតិមាតុភូមិនៅតាមបណ្ដោយព្រំដែនកម្ពុជា-ថៃ និងក្នុងស្មារតីស្នេហាជាតិ សាមគ្គីភាព ជាតិដ៏រឹងមាំរវាងប្រជាជនកម្ពុជាទូទាំងប្រទេសដែលជាកម្លាំងជួរក្រោយ ជាមួយកងទ័ពជួរមុខឱ្យបានកាន់តែផុលផុសបន្ថែមទៀត។