សាលា ប៊ែលធី អន្តរជាតិ បានរៀបចំកម្មវិធីសិក្សាបន្ថែម (កម្មវិធីបង្កើនចំណេះដឹងទូទៅ) ក្រោមប្រធានបទ “ទស្សនទានព្រះពុទ្ធសាសនា” ជូនដល់សិស្សានុសិស្សផ្នែកចំណេះទូទៅថ្នាក់ទី៩ និងភាសាអង់គ្លេសទូទៅ កម្រិតទី៩ (Level 9) មកពីបណ្តាសាខា នៃសាលា ប៊ែលធី អន្តរជាតិទាំង ៣២ទីតាំង ចំនួន ៣,៥៨៥ នាក់ ដឹកនាំដោយ ឯកឧត្តម លី ប៊ុនឆៃ អគ្គនាយករង ប៊ែលធី គ្រុប និងជាប្រធានគណៈគ្រប់គ្រងនាយកសាខា ក្រោមព្រះអធិបតីភាព សម្តេចព្រះឧត្តមវង្សា បណ្ឌិត គូ សុភាព សមាជិក និងជាអគ្គលេខាធិការរង ថេរសភា នៃព្រះពុទ្ធសាសនា នៅព្រះរាជាណាចក្រកម្ពុជា។

កម្មវិធីនេះប្រព្រឹត្តទៅតាមបែបចម្រុះ (ចូលរួមដោយផ្ទាល់វត្តនិគ្រោធវ័ន “គល់ទទឹង”  ចំនួន ៦៣២ នាក់ និងចូលរួមពីចម្ងាយតាមរយៈប្រព័ន្ធអេឡិចត្រូនិក ZOOM Workplace & Telegram Channel Live Stream ចំនួន ២៩៥៣ នាក់) នាថ្ងៃពុធ ៧កើត ខែចេត្រ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៥ ខែមីនា ឆ្នាំ២០២៦។

គួរបញ្ជាក់ផងដែរថាកម្មវិធីបង្កើនចំណេះដឹងទូទៅគឺជាកម្មវិធីសិក្សាបន្ថែមទី២ ក្នុងចំណោមកម្មវិធីសិក្សាបន្ថែមធំៗទាំង១២ លើកម្មវិធីសិក្សារបស់ក្រសួងអប់រំដែលមានស្រាប់។

គោលបំណងសំខាន់ នៃការរៀបចំកម្មវិធីនេះឡើងគឺ ដើម្បីឱ្យសិស្សានុសិស្សនៃសាលា ប៊ែលធី អន្តរជាតិទាំងអស់បានសិក្សាបន្ថែមពីចំណេះដឹងថ្មីមួយទៀត ព្រមទាំងលើកតម្លៃព្រះពុទ្ធសាសនា ដែលជាសាសនារបស់រដ្ឋ និងបញ្រ្ជាបព្រះពុទ្ធឱវាទដល់សិស្សានុសិស្សយល់ដឹងពីបុណ្យ បាប គុណ ទោស មានកតញ្ញូតាធម៌ចំពោះមាតាបិតា ដែលបានចិញ្ចឹមបីបាច់ថែរក្សា ក៏ដូចជាអប់រំពង្រឹងសីលធម៌ សុជីវធម៌ក្នុងសង្គមឱ្យជៀសផុតពីការប្រើប្រាស់គ្រឿងញៀន ទប់ស្កាត់អំពើហិង្សាក្នុងគ្រួសារ អំពើអនាចារ ជាពិសេសបានសិក្សាពីកម្មវិធីអប់រំផ្លូវចិត្តបានយ៉ាងច្រើនថែមទៀតផង។