សាលា ប៊ែលធី អន្តរជាតិ បានរៀបចំកម្មវិធីបង្កើនចំណេះដឹងទូទៅ ក្រោមប្រធានបទ «ទស្សនទានព្រះពុទ្ធសាសនា» ដែលបាននិមន្តចូលរួមជាព្រះធម្មកថិក ដឹកនាំដោយ ព្រះបញ្ញាមុនីញាណ ហាក់ សៀងហៃ សម្រាប់សិស្សានុសិស្សនៅតាមបណ្តាសាខា នៃសាលា ប៊ែលធី អន្តរជាតិទាំង ៣០ទីតាំង ក្រោមអធិបតីភាព ឯកឧត្តម លី ប៊ុនឆៃ អគ្គនាយករង ប៊ែលធី គ្រុប និងជាប្រធានគណៈគ្រប់គ្រងនាយកសាខា ដោយមានការចូលរួមផ្ទាល់នៅសាលសន្និសីទ នៃសាកលវិទ្យាល័យ ប៊ែលធី អន្តរជាតិទីតាំងទី២ (ស្ពានអាកាសចោមចៅ) ចំនួន ៦៣១ នាក់ ព្រមទាំងការចូលរួមពីចម្ងាយតាមប្រ័ពន្ធអេឡិចត្រូនិក (ZOOM Workplace & Telegram Channel Live Stream) ចំនួន ២៤២៦ នាក់។ កម្មវិធីនេះបានប្រព្រឹត្តទៅ នាព្រឹកថ្ងៃសុក្រ ៩កើត ខែអាសាឍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី០៤ ខែកក្កដា ឆ្នាំ២០២៥។ 

✍🏻 គួរបញ្ជាក់ផងដែរថា «ទស្សនទានព្រះពុទ្ធសាសនា»   គឺជាផ្នែកមួយនៃកម្មវិធីសិក្សាបន្ថែមទី២ (កម្មវិធីបង្កើនចំណេះដឹងទូទៅ) ក្នុងចំណោមកម្មវិធីសិក្សាបន្ថែមធំៗទាំង១២ លើកម្មវិធីសិក្សារបស់ក្រសួងអប់រំដែលមានស្រាប់។ 

📌 គោលបំណងសំខាន់ នៃការរៀបចំកម្មវិធីនេះឡើងគឺ ដើម្បីឱ្យសិស្សានុសិស្សនៃសាលា ប៊ែលធី អន្តរជាតិទាំងអស់បានសិក្សាបន្ថែមពីចំណេះដឹងថ្មីមួយទៀត ព្រមទាំងលើកតម្លៃព្រះពុទ្ធសាសនា ដែលជាសាសនារបស់រដ្ឋ និងបញ្រ្ជាបព្រះពុទ្ធឱវាទដល់សិស្សានុសិស្សយល់ដឹងពីបុណ្យ បាប គុណ ទោស មានកតញ្ញូតាធម៌ចំពោះមាតាបិតា ដែលបានចិញ្ចឹមបីបាច់ថែរក្សា ក៏ដូចជាអប់រំពង្រឹងសីលធម៌ សុជីវធម៌ក្នុងសង្គមឱ្យជៀសផុតពីការប្រើប្រាស់គ្រឿងញៀន ទប់ស្កាត់អំពើហិង្សាក្នុងគ្រួសារ អំពើអនាចារ ជាពិសេសបានសិក្សាពីកម្មវិធីអប់រំផ្លូវចិត្តបានយ៉ាងច្រើនថែមទៀតផង។