សាលា ប៊ែលធី អន្តរជាតិ បានរៀបចំកម្មវិធីសិក្សាបន្ថែម (កម្មវិធីបង្កើនចំណេះដឹងទូទៅ) ក្រោមប្រធានបទ «ការយល់ដឹងអំពីរបបសន្តិសុខសង្គម (ប.ស.ស.) និងផ្នែកប្រាក់សោធន» ក្រោមអធិបតីភាពឯកឧត្តម លី ប៊ុនឆៃ អគ្គនាយករងប៊ែលធី គ្រុប និងជាប្រធានគណៈគ្រប់គ្រងនាយកសាខា  ដែលមានការអញ្ជើញចូលរួមជាវាគ្មិនកិត្តិយសដោយ លោក សុក បូរ៉ា ប្រធាននាយកដ្ឋានតាវកាលិត នៃបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ ជូនដល់សិស្សានុសិស្សថ្នាក់ទី១២ នៅតាមបណ្ដាសាខា នៃសាលា ប៊ែលធី អន្តរជាតិទាំង ៣០ទីតាំង សរុបចំនួន ២៧៦០ នាក់ ដោយមានការចូលរួមតាមបែបចម្រុះ (ចូលរួមដោយផ្ទាល់នៅសាលសហសិក្សានៃសាលា ប៊ែលធី អន្តរជាតិទី៩-សាខាស្ទឹងមានជ័យ ចំនួន ២១៨ នាក់ និងចូលរួមពីចម្ងាយតាមរយៈប្រព័ន្ធអេឡិចត្រូនិក Zoom Workplace & Telegram Channel Live Stream ចំនួន ២៥៤២ នាក់) នាថ្ងៃសៅរ៍ ២រោច ខែអាសាឍ ឆ្នាំម្សាញ់ សប្តស័ក ព.ស.២៥៦៩ ត្រូវនឹង ថ្ងៃទី១២ ខែកក្កដា ឆ្នាំ២០២៥។

គួរបញ្ជាក់ផងដែរថា កម្មវិធីបង្កើនចំណេះដឹងទូទៅ ក្រោមប្រធានបទ “ការយល់ដឹងអំពីរបបសន្តិសុខសង្គម (ប.ស.ស.) និងផ្នែកប្រាក់សោធន”  គឺជាកម្មវិធីសិក្សាបន្ថែមទី២ ក្នុងចំណោមកម្មវិធីសិក្សាបន្ថែមធំៗទាំង១២ លើកម្មវិធីសិក្សារបស់ក្រសួងអប់រំដែលមានស្រាប់។ 

គោលបំណងសំខាន់ នៃការរៀបចំកម្មវិធីនេះឡើងគឺ ឱ្យសិស្សានុសិស្សយល់ដឹងអំពីអត្ថប្រយោជន៍ និងលក្ខណៈពិសេសរបស់បេឡាជាតិសន្តិសុខសង្គម(ប.ស.ស) ស្ដីពីរបបហានិភ័យការងារ របបថែទាំសុខភាព និងរបបប្រាក់សោធន ដើម្បីឱ្យសិស្សបានយល់ដឹង និងត្រៀមខ្លួនរួចជាស្រេច សម្រាប់ឈានចូលក្នុងវិស័យការងារបន្ទាប់ពីបញ្ចប់ការសិក្សានៅថ្នាក់វិទ្យាល័យ និងថ្នាក់មហាវិទ្យាល័យ។