ឯកឧត្តមបណ្ឌិត លី ឆេង តំណាងរាស្ដ្រមណ្ឌលរាជធានីភ្នំពេញ ស្ថាបនិក-អគ្គនាយក នៃប៊ែលធី គ្រុប និងជាប្រធានក្រុមប្រឹក្សាភិបាល បានជួបសំណេះសំណាល និងអបអរសាទរជាមួយសិស្សឆ្នើម ចំនួន ២៩ រូប នៃថ្នាក់ភាសាអង់គ្លេសទូទៅ កម្រិតទី១២ (Level 12) ដែលទទួលបានពិន្ទុចាប់ពី ៦.៥ ដល់ ៧.០ ក្នុងការប្រឡងតេស្តអន្តរជាតិអាយអិល (IELTS) និងជាតំណាងឱ្យសិស្សទាំង ១៥៣ រូប ដែលបានប្រឡង តេស្តអាយអិល (IELTS) ព្រមទាំងទទួលបានពិន្ទុចាប់ពី ៥.០ឡើងទៅ នាព្រឹកថ្ងៃអង្គារ ១២រោច ខែអសាឍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២២ ខែកក្កដា ឆ្នាំ២០២៥ នៅអគារស្នាក់ការកណ្តាល នៃប៊ែលធី គ្រុប។ 

✍️សូមបញ្ជាក់ផងដែរថា ក្នុងចំណោមសិស្សទាំង ១៥៣រូប សិស្សដែលទទួលបានពិន្ទុចាប់ពី ៥.០ ដល់ ៧.០ មានចំនួន ១២៣រូប ស្មើនឹង ៨៦% នេះជាមោទនភាពរបស់ សាលា ប៊ែលធី អន្តរជាតិ នៃថ្នាក់ភាសាអង់គ្លេសទូទៅ ដែលបានប្រឡងជាប់តេស្តអន្តរជាតិអាយអិល (IELTS) ដែលមានកាទទួលស្គាល់ពេញពិភពលោក។ 

ទន្ទឹមគ្នានេះដែរ ដោយមានការចុះអនុស្សរណយោគយល់ (MOU) ជាមួយ British Council ដែលមានទីតាំងនៅទីក្រុងឡុងដ៏ (London) នៃចក្រភពអង់គ្លេស រាល់សិស្សភាសាអង់គ្លេសដែលត្រូវប្រឡងបញ្ចប់កម្រិត Level-12 តម្រូវឱ្យមានការប្រឡងតេស្តអន្តរជាតិ អាយអិល (IELTS) ដើម្បីវាស់ស្ទង់សមត្ថភាពភាសាអង់គ្លេស។ ចំពោះសិស្សដែលមិនបានប្រឡងតេស្តអន្តរជាតិ អាយអិល (IELTS) តម្រូវឱ្យប្រឡង Exit-Exam ដើម្បីទទួលបានសញ្ញាបត្រភាសាអង់គ្លេសប៊ែលធី។

តេស្តអន្តរជាតិ អាយអិល (IELTS) គឺជាតេស្តវាស់ស្ទង់សមត្ថភាពភាសាអង់គ្លេស ដែលរៀបចំ និងគ្រប់គ្រងដោយក្រុមប្រឹក្សាភាសាអង់គ្លេស (British Council) ដែលមានទីតាំងនៅទីក្រុងឡុងដ៏ (London) នៃចក្រភពអង់គ្លេស។ អាយអិល (IELTS) គឺជាតេស្តកម្រិតស្តង់ដារអន្តរជាតិ  ដែលផ្តោតសំខាន់ទៅលើជំនាញភាសាអង់គ្លេសទាំងបួនគឺ ការស្តាប់ ការអាន ការសរសេរ និងការនិយាយ ដែលត្រូវបានទទួលស្គាល់ជាអន្តរជាតិ។