សាលា ប៊ែលធី អន្តរជាតិបានរៀបចំ សិក្ខាសាលាបំប៉នគរុកោសល្យ (On the job training) ជូនដល់លោកគ្រូ-អ្នកគ្រូ ផ្នែកភាសាអង់គ្លេសទូទៅ ដែលកំពុងបង្រៀនកម្រិត Starter ដល់កម្រិត Preschool 6 ក្រោមប្រធានបទ “តើធ្វើដូចម្តេច ដើម្បីក្លាយខ្លួនជាគ្រូមត្តេយ្យដ៏ល្អ?” ដោយមានការអញ្ជើញចូលរួមធ្វើបទបង្ហាញចែករំលែកចំណេះដឹង និងបទពិសោធន៍ពីវាគ្មិនកិត្តិយស ចំនួន ៣រូប មកពីវិទ្យាស្ថានគរុកោសល្យរាជធានីភ្នំពេញ ក្រោមអធិបតីភាព ឯកឧត្តម លី ប៊ុនឆៃ អគ្គនាយករង ប៊ែលធី គ្រុប និងជាប្រធានគណៈគ្រប់គ្រងនាយកសាខា តំណាងដ៏ខ្ពង់ខ្ពស់ ឯកឧត្តមបណ្ឌិត លី ឆេង តំណាងរាស្រ្តមណ្ឌលរាជធានីភ្នំពេញ ស្ថាបនិក-អគ្គនាយកប៊ែលធី គ្រុប និងជាប្រធានក្រុមប្រឹក្សាភិបាល នៃសាកលវិទ្យាល័យ ប៊ែលធី អន្តរជាតិ។

ក្នុងសិក្ខាសាលានេះ ក៏មានការអញ្ជើញចូលរួមពី ប្រធាន-អនុប្រធានការិយាល័យភាសាអង់គ្លេសទូទៅ នាយករងសាខាទទួលបន្ទុកផ្នែកភាសាអង់គ្លេស (DE) និងលោកគ្រូ-អ្នកគ្រូកម្រិត Starter ដល់កម្រិត Preschool 6 មកពីគ្រប់សាខានៃសាលា ប៊ែលធី អន្តរជាតិ សរុបចំនួន ១៧១ នាក់ ផងដែរ។ 

សិក្ខាសាលាបំប៉នគរុកោសល្យនេះ រៀបចំឡើងក្នុងគោលបំណង៖
១-ពង្រឹងគុណភាពអប់រំ និងបង្កើនសមត្ថភាពបង្រៀនជូនលោកគ្រូ-អ្នកគ្រូ ផ្នែកភាសាអង់គ្លេសឱ្យកាន់តែមានប្រសិទ្ធភាពខ្ពស់
២-ចែករំលែកចំណេះដឹង បទពិសោធន៍ថ្មីៗ និងវិធីសាស្ត្របង្រៀនទំនើបៗ ស្របតាមតម្រូវការនៃវិស័យអប់រំនាបច្ចុប្បន្ន
៣-បណ្តុះសមត្ថភាពលោកគ្រូ-អ្នកគ្រូក្នុងការរៀបចំផែនការបង្រៀន ការប្រើប្រាស់សម្ភារឧបទេស និងការអនុវត្តសកម្មភាពសិក្សាក្នុងថ្នាក់រៀន
៤-ពង្រឹងជំនាញគ្រប់គ្រងថ្នាក់រៀន ការទំនាក់ទំនងជាមួយសិស្ស និងការដោះស្រាយបញ្ហាផ្សេងៗក្នុងដំណើរការបង្រៀន
៥-លើកកម្ពស់ក្រមសីលធម៌វិជ្ជាជីវៈគ្រូបង្រៀន ស្មារតីទទួលខុសត្រូវ និងការធ្វើខ្លួនជាគំរូល្អសម្រាប់សិស្សានុសិស្ស
៦-ជំរុញការអភិវឌ្ឍវិជ្ជាជីវៈគ្រូបង្រៀនឱ្យស្របតាមបាវចនាប៊ែលធី គឺ “គុណភាព ប្រសិទ្ធភាព ឧត្តមភាព សីលធម៌”

សិក្ខាសាលាដ៏មានសារៈសំខាន់នេះ បានប្រព្រឹត្តទៅនាថ្ងៃព្រហស្បតិ៍ ១២កើត ខែជេស្ឋ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី២៨ ខែឧសភា ឆ្នាំ២០២៦ នៅស្នាក់ការកណ្តាល ប៊ែលធី គ្រុប៕