គ្មានក្តីសប្បាយណា សប្បាយដូចជោគជ័យដែលបានមកពីសមត្ថភាពរបស់ខ្លួនឯង
             …………………………………
អបអរសាទរ! កម្មវិធីពិព័រណ៍ និងការប្រកួតប្រជែងគម្រោងអប់រំស្ទែម និងស្ទីម លើកទី៥ ឆ្នាំ២០២៦ សម្រាប់សិស្សានុសិស្សថ្នាក់ទី៦ ទី៨ និងទី១១ នៃសាលា ប៊ែលធី អន្តរជាតិ ដែលមានអ្នកចូលរួមសរុបប្រមាណជាង ៥០០០ នាក់
===================
សាលា ប៊ែលធី អន្តរជាតិ បានរៀបចំកម្មវិធីពិព័រណ៍ និងការប្រកួតប្រជែងគម្រោងអប់រំស្ទែម និងស្ទីម លើកទី៥ ឆ្នាំ២០២៦ សម្រាប់សិស្សានុសិស្សថ្នាក់ទី៦ ទី៨ និងទី១១ នៃសាលា ប៊ែលធី អន្តរជាតិ ក្រោមអធិបតីភាព ឯកឧត្តម លី ប៊ុនឆៃ អគ្គនាយករងប៊ែលធី គ្រុប និងជាប្រធានគណៈគ្រប់គ្រងនាយកសាខា ដោយមានការចូលរួមពីសំណាក់សិស្សានុសិស្ស ៨៧ ក្រុម ស្មើនឹង ៤៣៦ នាក់ ក្នុងការដាក់តាំងបង្ហាញស្នាដៃប្រកបដោយភាពច្នៃប្រតិដ្ឋ ដែលមានសិស្សចូលរួមទស្សនាសរុបប្រមាណជាង ៥០០០ នាក់ មកពីបណ្តាសាខា នៃសាលា ប៊ែលធី អន្តរជាតិ។

កម្មវិធីនេះរៀបចំឡើងក្នុងគោលបំណង៖
១-លើកកម្ពស់ការយល់ដឹង និងការអនុវត្តលើវិស័យវិទ្យាសាស្ត្រ បច្ចេកវិទ្យា វិស្វកម្ម គណិតវិទ្យា និងសិល្បៈ (STEM/STEAM) តាមរយៈគម្រោងសិក្សាប្រកបដោយភាពច្នៃប្រតិដ្ឋ។
២-ជំរុញសិស្សានុសិស្សឱ្យអនុវត្តចំណេះដឹងទ្រឹស្តីទៅក្នុងការបង្កើតគម្រោង ស្នាដៃ និងនវានុវត្តន៍ដែលមានគុណភាព និងអាចប្រើប្រាស់បានក្នុងជីវិតប្រចាំថ្ងៃ។
៣-អភិវឌ្ឍជំនាញសតវត្សរ៍ទី២១ រួមមាន ការធ្វើការងារជាក្រុម ការទំនាក់ទំនងប្រកបដោយប្រសិទ្ធភាព ភាពជាអ្នកដឹកនាំ ការគ្រប់គ្រងពេលវេលា និងការធ្វើបទបង្ហាញជាសាធារណៈ។
៤-បង្កើតវេទិកាសម្រាប់សិស្សានុសិស្សក្នុងការបង្ហាញសមត្ថភាព ស្នាដៃ និងគំនិតច្នៃប្រតិដ្ឋ។
៥-លើកទឹកចិត្តឱ្យសិស្សានុសិស្សស្រឡាញ់ការស្រាវជ្រាវ ការច្នៃប្រតិដ្ឋ និងការរៀនសូត្រពេញមួយជីវិត ដើម្បីត្រៀមខ្លួនក្លាយជាធនធានមនុស្សប្រកបដោយសមត្ថភាព និងភាពប្រកួតប្រជែងនៅថ្នាក់ជាតិ និងអន្តរជាតិ។

កម្មវិធីនេះបានប្រព្រឹត្តទៅ រយៈពេល ២ថ្ងៃ នាថ្ងៃពុធ-ព្រហស្បតិ៍ ២-៣រោច ខែបឋមាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១-២ ខែកក្កដា ឆ្នាំ២០២៦ នៅសាលសន្និសីទ នៃសាកលវិទ្យាល័យ ប៊ែលធី អន្តរជាតិ ទីតាំងទី២ (ស្ពានអាកាសចោមចៅ)។