គ្មានក្តីសប្បាយណា សប្បាយដូចជោគជ័យដែលបានមកពីសមត្ថភាពរបស់ខ្លួនឯង
          …………………………………
អបអរសាទរ! កម្មវិធីប្រកួតជជែកដេញដោល ផ្នែកភាសាអង់គ្លេសទូទៅ រដូវកាលទី៤ ឆ្នាំ២០២៦ របស់សិស្សភាសាអង់គ្លេសកម្រិតទី៩ និងទី១០ (Level 9 & 10)  និងកម្រិតទី១១ និងទី១២ (Level 11 & 12)  នៃសាលា ប៊ែលធី អន្តរជាតិ វគ្គផ្តាច់ព្រ័ត្រ
===================
សាលា ប៊ែលធី អន្តរជាតិ បានរៀបចំកម្មវិធីប្រកួតជជែកដេញដោល រដូវកាលទី៤ ឆ្នាំ២០២៦ វគ្គផ្តាច់ព្រ័ត្រ សម្រាប់សិស្សផ្នែកភាសាអង់គ្លេសកម្រិតទី៩ និងទី១០ និងកម្រិតទី១១ និងទី១២ នៃសាលា ប៊ែលធី អន្តរជាតិ ក្រោមអធិបតីភាព ឯកឧត្តម លី ប៊ុនឆៃ អគ្គនាយករង ប៊ែលធី គ្រុប និងជាប្រធានគណៈគ្រប់គ្រងនាយកសាខា។

*ការប្រកួតនារសៀលនេះមានចំនួន ២ ប្រធានបទដូចខាងក្រោម៖
ប្រធានបទសម្រាប់កម្រិតទី៩ & ១០៖ ការអប់រំក្នុងគ្រួសារ ជាកត្តាចម្បងក្នុងការទប់ស្កាត់ក្មេងទំនើងក្នុងសង្គមប្រកបដោយប្រសិទ្ធភាព។
- ក្រុមស្រប៖ សាលា ប៊ែលធី អន្តរជាតិទី១៧ (សាខាឫស្សីកែវ គីឡូលេខ១០) បេក្ខជនវេនព្រឹក
- ក្រុមបដិសេធ៖ សាលា ប៊ែលធី អន្តរជាតិទី២១ (សាខាផ្សារឈូកមាស) បេក្ខជនវេនរសៀល

ប្រធានបទសម្រាប់កម្រិតទី១១ & ១២៖ ការចូលរួមគាំទ្រមាតិកាអប់រំនៅលើបណ្តាញសង្គម គឺជាយន្តការសំខាន់ក្នុងការលើកកម្ពស់ចំណេះដឹង និងភាពជាពលរដ្ឋល្អដល់សង្គម។
- ក្រុមស្រប៖ សាលា ប៊ែលធី អន្តរជាតិទី១៣ (សាខារង្វង់មូលកាំកូស៊ីធី) បេក្ខជនវេនព្រឹក
-  ក្រុមបដិសេធ៖ សាលា ប៊ែលធី អន្តរជាតិទី១៧ (សាខាឫស្សីកែវ គីឡូលេខ១០) បេក្ខជនវេនព្រឹក

កម្មវិធីនេះធ្វើឡើងក្នុងគោលបំណង៖
១-ពង្រឹងសមត្ថភាព និងជំនាញនៃការត្រិះរិះពិចារណា ការគិតវិភាគ និងការដោះស្រាយបញ្ហា តាមរយៈការជជែកដេញដោលលើប្រធានបទផ្សេងៗ
២-កសាងសមត្ថភាពសិស្សានុសិស្សឱ្យមានភាពក្លាហាន ភាពឈ្លាសវៃ និងទំនុកចិត្តក្នុងការបញ្ចេញមតិជាសាធារណៈ
៣-បណ្តុះសមត្ថភាពក្នុងការស្រាវជ្រាវ ការរៀបចំគំនិត ការប្រើប្រាស់ហេតុផល និងការបង្ហាញអំណះអំណាងប្រកបដោយភាពប្រាកដប្រជា
៤-បង្កើនសមត្ថភាពសិស្សានុសិស្សក្នុងការស្តាប់ គោរព និងទទួលយកមតិយោបល់ពីអ្នកដទៃ
៥-ពង្រឹងស្មារតីធ្វើការជាក្រុម ភាពជាអ្នកដឹកនាំ និងការទទួលខុសត្រូវក្នុងការបំពេញតួនាទីរបស់ខ្លួន
៦-ផ្តល់ឱកាសដល់សិស្សានុសិស្ស ក្នុងការបង្ហាញសមត្ថភាព ទេពកោសល្យ និងសក្តានុពលរបស់ខ្លួនជាសាធារណៈ។

កម្មវិធីប្រកួតនេះបានប្រព្រឹត្តទៅ នារសៀលថ្ងៃព្រហស្បតិ៍ ១០រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៩ ខែកក្កដា ឆ្នាំ២០២៦ នៅសាកលវិទ្យាល័យ ប៊ែលធី អន្តរជាតិទីតាំងទី២ ( ស្ពានអាកាសចោមចៅ )។